Za razliku od mnogih ekipa koje na „Santjago Bernabeu“ dođu da se brane, „pčelice“ su od početka krenule u otvoreno nadigravanje.

Ređale su se šanse na obje strane, Raul Asensio je sjajnim blokom spriječio vođstvo Raja nakon šuta Andreja Raciuja, a onda je Real u svega četiri minuta praktično riješio sve dileme – Kilijan Mbape je u 30. minutu donio vođstvo timu Karla Anćelotija, a Vinisijus u 34. povisio na 2:0.

Rajo je do zasluženog gola stigao u sudijskoj nadoknadi, kada je lopta nakon sjajnog šuta Pedra Dijasa završila iza zamišljene gol-linije. Andrij Lunjin nije mogao ništa, a pogodak je priznat nakon pregleda VAR-a.

U 2. poluvremenu više nije bilo tako vatreno, a najbolju priliku je imao Vinisijus, koji je u 76. minutu promašio zicer.

Real je bez mnogo problema sačuvao pobjedu i sa 57 bodova se izjednačio sa Barselonom, koja ima utakmicu manje.